![Résultat de recherche d'images pour "explorers builders directors and negotiators test"](https://i.ytimg.com/vi/3jWljiYEkec/maxresdefault.jpg)
قبل ما نبداو، شنو هي الشخصية بعدا ؟
الشخصية هي مجموع السلوكات لي كتميز شخص عن آخر…لمهم الدكتورة الأمريكية هيلين فيشر عالمة الأنترويولوجية البيولوجية كتقول لينا بلي الشخصية كتحددها الثقافة لي كتعيش فيها و الطباع ديالك…من بعد بحث عميق و استنادا على إحصائيات، قدرات هاد الدكتورة تحدد نوع الشخصيات من خلال النواقل العصبية.البحث دار على 14 مليون شخص من الولايات المتحدة و كذلك آلاف الأشخاص من حوالي 40 دولة، و هالاش توصلات الدكتورة.
لي خاصنا نعرفو بعدا هو النواقل العصبية هي الهرمونات لي كتساعد مرور المعلومة داخل الشبكة الدماغية، هاد المعلومات هي لي كتخلينا ناخدو القرارات ديالنا، و اليوم غادي نتكلمو على ربعات ديال النواقل لي مهمة و لي كتحدد نوعا ما الشخصية ديالنا و خصوصا دورنا داخل المجتمع.
قبل ما ندوي على النواقل العصبية و لا الهرمونات غادي ندويو على أربع الشخصيات المهمة و كل وحدة و الهرمون لي كتفرزو بشكل أكثر على باقي الهرمونات…لي خاصنا نعرفو هو أن هاد الهرمونات راه عند جميع البشر غير التفاوت ديالها هو لي كيدير الفرق بينتنا.
1) الشخصية الباحثة الفضولية
![](https://editorial.designtaxi.com/editorial-images/news-4LoveTypes150817/4-Love-Types-Psychology-Explorer-Builder-Director-Negotiator-3.jpg)
أول شخصية غادي نبداو بها هي »الشخصية الباحثة الفضولية، » هاد الشخصية كتكون كتحرك بزاف و كتكون عندها عقلية منفتحة ديما باغا تعرف الجديد و كذلك شخصية مبدعة. لي كيحرك هاد الشخصية هو هرمون سميتو »الدوبامين » و هو لي كيعطيها ديك لنيرجي باش تخرج و تقلب، و غالبا كتكون شخصية عزيز عليها المغامرة…متنساش بلي البحث و المعرفة و الخروج عن المألوف حتا هو مغامرة.
2) الشخصية البناءة
![](https://editorial.designtaxi.com/editorial-images/news-4LoveTypes150817/4-Love-Types-Psychology-Explorer-Builder-Director-Negotiator-4.jpg)
..الشخصية الثانية هي الشخصية البناءة، آه عزيز عليها تبني و تقاد و تصاوب و ترد لبال للتفاصيل و عندها الخاطر ديال بصح و غالبا كتبع النظام لي هي فيه بلا صداع بلا والو، و كتكون محترمة و ممكن تكون أكثر تدينا، و كتحكم أكثر في نفسها في المواقف الصعبة، و الدكتورة هيلين كتسميها بالحذرة و لا الشخصية المتوافقة مع المعايير الإجتماعية، و الهرمون لي كيقود هاد الشخصية هو »السيروتونين ».
3) شخصية المدراء
![](https://editorial.designtaxi.com/editorial-images/news-4LoveTypes150817/4-Love-Types-Psychology-Explorer-Builder-Director-Negotiator-5.jpg)
..الشخصية الثالثة هي شخصية المدراء، صحاب دير هادي لا مديرش هادي، غالبا كتكون صادقة و تايقة فراسها و كتخدم الناس، كتكون عندها بعد النظر و كتركز بزاف في التفاصيل، كين مشكل واحد هو أنها مكتعاطفش بزاف مع بنادم و قليل عندها الجانب الحسي، داكشي علاش كتلقاها ديما طالع ليه الدم و زعفانة و لكن كتبقا شخصية قيادية…أما الهرمون لي كيقود هاد الشخصية هو ‘التستسترون ».
4) الشخصية المساومة
![](https://editorial.designtaxi.com/editorial-images/news-4LoveTypes150817/4-Love-Types-Psychology-Explorer-Builder-Director-Negotiator-6.jpg)
..الشخصية الرابعة و الأخيرة و المثيرة للجدل، هي ديك الشخصية لي كتعرف كيفاش تخرج راسها، و داكشي علاش تسمات الشخصية المساومة، يعني شخصية كتناقش و كتحاول تلقا حل وسط، هاد الشخصية هي شخصية هادءة ديال بصح و كيغلب عليها الخيال، و حتا هي منفتحة و كتعاطف مع الناس، غالبا هاد الشخصية كتلقاها خدامة في المبيعات و لا الشخصيات الدبلوماسية حيت كيفما كنقولو حنا دمها بارد و لي فيها سلبي هو أنها تقدر تبقى تصبر بزاف حتى شي نهار كتنفجر فوجه شي واحد حتى ما كيفهم فيها والو…أما بخصوص الهرمون لي كيقود هاد الشخصية هو » الإستروجين »
دابا واش عرفتي شمن شخصية نتا ؟
Source: https://bigthink.com/philip-perry/this-biological-anthropologist-is-mapping-the-human-personality
Zakaria Benirzik
Contributor
موظف بمجال الإتصالات و حاصل على شهادة الماستر في التجارة العالمية، محب للبحث و المطالعة في مجال علم النفس بشتى أنواعه.
×
Zakaria Benirzik
Contributor
موظف بمجال الإتصالات و حاصل على شهادة الماستر في التجارة العالمية، محب للبحث و المطالعة في مجال علم النفس بشتى أنواعه.